كيفية عمل نجارة السلم بالشكل الصحيح وماهو بادى السلم وكيفية تحديد منسوب بسطة نصف الدور وكيفية استلام نجارة السلم

نجارة السلم 

 

السلام عليكم زوار موقع معا للتصميم والمقاولات هنقدم لكم فى الموضوع داه كيفية عمل نجارة السلم بالشكل الصحيح وماهو بادى السلم وكيفية تحديد منسوب بسطة نصف الدور وكيفية استلام نجارة السلم بالكل الصحيح متمنين لكم كامل الاستفادة ان شاء الله .

 

 

هو عنصر بينقل الاشخاص من منسوب الى منسوب اخر

⦁    يتكون السلم من قلبه + بسطة نصف الدور + قلبه 
⦁    القلبة هى عبارة عن بلاطة السلم المائله وهى تتكون من عدد من الدرجات وهذه الدرجات عباره عن قايمه ونايمه 
⦁    اهم حاجه فى السلم لمهندس التنفيذ هى استخلاص الداتا من اللوح بشكل صحيح 
⦁    مشاكل السلم دائما تظهر فى التشطيب والسبب المباشر لذالك هو عدم استخلاص الداتا الصحيحه من اللوح وعدم تنفيذ الابعاد الصحيحه للسلم 
⦁    السلم هو عنوان المهندس بيكلم بالنيابه عنه لو صح يبقى انت مهندس فاهم 

طيب ازاى انفذ سلم صح 

مطلوب منك استخراج هذه البيانات من اللوح 
⦁    نحدد بادى السلم هو  فين فى الواقع من اللوحه ونحدد نهاية السلم 
⦁    منسوب نصف الدور البسطه 
⦁    نجيب منسوب التطبيق لبسطة نصف الدور 

اولا بادى السلم 

⦁    اول حاجة نبص على بادى السلم فى الانشائى نشوف المصمم موضح اماكن الاشاير ولا سايبها للمنفذ 
⦁    المفروض المهندس المعمارى يضع خط على السلم يبين اتجاه الصعود فى السلم والافضل يكون فى عكس اتجاه عقارب الساعه عشان الدورة الدمويه 
⦁    طيب فى حالة انه المعمارى لم يبين على اللوحه احنا نبص فى المعمارى هنلاقى خطين واحد سوليد والتانى داش المكان اللى فيه الخط السوليد اول داه بادى السلم لان المعمارى بيبص لتحت 
⦁    نستخرج من المعمارى بادى السلم ونهاية السلم والبعد الافقى بين البداية والنهاية وعدد الدرجات 

⦁    نخلى بالنا أول ما نستلم اللوح قبل الشغل فى القواعد نعمل لوحة مناسيب ونحدد عليها بادى السلم 
⦁    لو فيه بدروم ممكن السلم يطلع من البدروم او من سقف البدروم فاحنا نشيك على النقطه دى ضرورى عشان لو فيه سلم فى البدروم يبقا نحط الأشاير فى القواعد او اللبشه ولو مافيش سلم تحت يبقا الأشاير هتطلع من سقف البدروم  
⦁    فى الابراج ممكن يكون فيه سلم طوارىء وداه بيبقا طالع من الاساسات تحت بتاعة البدروم والسلم الرئيسى بيطلع من سقف البدروم فبنزرع اشاير له فى السقف 
⦁    المهم فى الليله دى لما تستلم اللوح تدور على اماكن السلم وكم سلم موجود وتحدد البادى لهم عشان نزرع اشاير  السلم 
⦁    لو الاساسات عندنا نوعها لبشه يبقا البادى طالع منها ولو كانت قواعد منفصله يبقا هتطلع من القاعده او السمل حسب مكان البادى ولو مافيش سمل نعمل احنا سمل لان السمل ماينفعش يطلع على التراب لأنه هيحصل له هبوط وبالتالى هيحصل انهيار

⦁    لو اللوح الانشائيه مش موضحه بادى السلم نروح للمعمارى ونأخذ البادى من اول درجه ونربطه باى حاجه ثابته زى اقرب عمود ونوقعه ع الانشائى 
⦁    اول درجه فى بادى السلم لازم تبقى 20 سم عشان تشطيب الارضيات 10 سم وتشطيب السلم 5 سم وبالتالى يبقى صافى الدرجه 15 سم واخر درجه فوق بتبقى 10 سم 
⦁    اعلى درجه بتبقى اعلى من السقف بحوالى 5 سم عشان تقفل مع تشطيب الدور لان منسوب البسطه هو نفس منسوب تشطيب جميع شقق الدور 
⦁    عشان احسب ارتفاع الدرج باشوف فرق المنسوب من ظهر خرسانة الدور اللى انا طالع منه الى ظهر الدور اللى انا طالع اليه ونقسم هذا الفرق على عدد الدرجات اجيب ارتفاع كل درجه 

ارتفاع بادى السلم هام 

⦁    فى حالة لو كان فيه بدروم والسلم طالع من تحت هيكون طالع من القواعد او اللبشه هنعمل كروكى سريع للمناسيب حتى الصعمود الى البادى ونشوف فرق المنسوب ويكون هو الارتفاع المطلوب 

⦁    من الرسم الموضح اعلاه نجد ان ارتفاع البادى من القاعده المسلحه الى اول درجه = 20 سم سمك فرشه الخرسانه النظيفه + 20 سم اول درجه ( فى حالة تشطيب بلاط ) او 15 سم فى حالة عدم التشطيب يعنى ارتفاع البادى هيكون 40 سم او 15 سم

⦁    فى حالة لو فيه محلات مرتفعه على الواجهه بارتفاع 5 متر  مثلا طبعا صعب الشقق تبقى بنفس الارتفاع فبنضطر  نطلع برصيف من منسوب الصفر المعمارى الى منسوب ( + 2 ) ونبدأ السلم بتاع الشقق بس فى الحاله دى بادى السلو هيكون مرتفع وهيكون طالع من الاساسات فلو مثلا منسوب التاسيس كان على ( - 2 ) وعندنا القاعده العاديه 40 سم والمسلحه 60 سم والبادى هيطلع من منسوب المسلحه يعنى من منسوب ( - 1 ) هنردم حتى منسوب ( + 1.7 ) وفرشة نظافه 20 سم حتى منسوب ( + 1.9 ) ونطلع اول درجه 20 سم عشان نقفل تشطيب الارضيات مع تشطيب السلم يبقا وصلنا لمنسوب ( + 2.1 ) يبقا كدا ارتفاع البادى 2.1 + 1 = 3.1 متر 

منسوب بسطه نصف الدور 

⦁    المطلوب للنجار هو منسوب تطبيق بسطة نصف الدور وهو بعد كدا يشتغل لوحده تمام 
⦁    عشان نجيب منسوب بسطة نصف الدور هنشوف فرق المنسوب بين ظهر السقف اللى انا طالع منه ومنسوب ظهر السقف اللى انا طالعله واقسم الفرق على عدد الدرجات اجيب ارتفاع الدرجه الواحده
⦁    اعد الدرجات اللى تطلعنى الى منسوب البسطه وليكن 6 درجات اضرب 6 * ارتفاع الدرجه الواحده وبكدا يبقى جبنا ارتفاع منسوب بسطه نصف الدور ولكن من ظهر البسطه فوق 
⦁    بعد كدا نطرح سمك بلاطه البسطه نجيب منسوب الواح التطبيق اللى النجار محتاجها 
⦁    وانسب المنسوب داه من الصفر المعمارى ويبدأ يشتغل النجار فى السلم 

عدد النايمات والقايمات 

⦁    فى السلم القلبتين بيكون عدد النوايم = عدد القوايم – 1 
⦁    فى السلم الثلاث قلبات بيكون عدد النوايم = عدد القوايم – 3 

عرض السلم 

⦁    عشان نعرف عرض السلم نروح على لوحة المعمارى نشوف ابعاد عرض الدرج هى تقريبا نفس عرض البسطه فمثلا تطلع على اللوحه 120 سم  ( هأقول للنجار 120 سم  ) طبعا لا عشان دى الابعاد الصافيه للسلم بيكون لسه عندنا درابزين ( الكوبسته ) بيكون فى حدود ( 10 – 12 ) سم وفى كمان حائط نشوف عرضه 12 ام 20 سم بفرض ان الحائط 12 سم والدرابزين 12 سم يبقى انا ابلغ النجار ان عرض الدرج = 120 + 12 + 12 = 144 سم يعنى تقريبا هننفذ على 145 سم 

اشاير السلم 

⦁    اشاير السلم اللى بتطلع من البادى بتكون طول رباط فى الخارج وطول رباط فى الداخل يعنى 60 Ø اذا لم يذكر غير ذالك فى الملاحظات يعنى فى حدود 2 متر كلها تقريبا 
⦁    نروح نشوف تسليح السلم كم فى المتر من لوح الانشائى وليكن 6 Ø 16 مثلا وانا عندى عرض الدرج 145 سم يبقا عدد الاشاير = 6 * 1.45 = 8.7 يعنى هنحط فى البادى 9 اشاير حديد وتقسط مظبوط 

نجارة السلم 

⦁    بلاطة السلم ( القلبه + البسطه ) هى بالظبط بلاطة سقف تعامل نفس المعامله 
⦁    خطوات عمل السلم : النجار يبتدى بالبسطة يعمل الواح التطبيق بتاعتها عشان كدا بيبقا محتاج المنسوب بتاعه اول شىء بعد كدا يبدأ يشتغل فى القلبه 
⦁    بعد النجار ما يخلص القلبه يجى الحداد يفرد الحديد بتاعه بعد كدا يجى النجار يركب الدرج بتاعه 
⦁    النجار  عشان يبدأ يعمل البسطه محتاج حاجتين الاولى منسوب التطبيق للبسطه وداه عرفنا نجيبه ازاى الشىء التانى هو طول البسطه عند الواح التطبيق ودى عشان اجيبها لازم ارسم الدرج بالاتوكاد واعمل اوفست بسمك القلبه وسمك البسطه هيتلاقوا مع بعض فى نقطة اقيس منها الطول المطلوب 
⦁    النجار لو ماعطيتوش طول البسطه هيعمل ايه ؟؟ هيجى على الطول الاصلى للبسطه ويقص منه مقدار نايمه كامله ويشتغل بيسموها سابق ولاحق بس هيبقى فيه نسبة خطأ 

⦁    هنلاقى فى نجارة السلم انها هى نجارة السقف هتلاقى الواح تطبيق متحمله على عرقات والعرقات محمله على حمالات والحمالات متشاله بواسطة العروق 
⦁    خلى بالك النجار لازم يخلى باله قوى من ابعاد النايمه والقايمة فى شغل النجاره لان دى هى اللى بتخلى السلم يطلع مظبوط او بايظ 
⦁    النجار بعد ما يخلص القوايم تمام يسمر عليهم لوح لتزانه يسمى لوح حبس عشان يحبس القوايم فى منتصف القايم فما يحصلش تكريش للدرج فى المنتصف 

خلى بالك قوى 

⦁    النجار  لما يجى يحط نجارة جنب السلم لازم يراعى ان ارتفاع الجانب = ارتفاع قلبة السلم + ارتفاع القوايم للدرج عشان القوايم تكون محكومه وما تظهرش مشكلة المثلثات فى الجنب 
⦁    النجار  فى الجزء داه بيحاول يعمل الجنب على اد ارتفاع البلاطه فقط ويخلى القوايم طايره عشان ما يقصش اخشاب لتزانه بطول محكوم وليكن 145 سم عشان يبعد عن التهدير 
⦁    احنا نرغم النجار انه يعمل القوايم محكومة ويعمل ارتفاع الجنب المطلوب بكدا يطلع شكل السلم مظبوط والجنب املس 

خلى بالك قوى 

⦁    لو ارتفاع القوايم مثلا 16 سم النجار مش هيجيب الواح 16 لانها مش متوفره طيب هيعمل ايه 
⦁    ممكن يجيب لوح عشره سم ويجيب الواح ويقصها على 6 سم ويسمؤهم فى بعض بس النجار مش هيرضى يعمل كدا 
⦁    الحل المتداول هو انه يجيب لوحين 10 سم يحطهم فوق بعض كدا يبقا معانا 20 سم نخلى النجار يسمر مسمار عند ارتفاع 16 سم لجميع القوايم واتأكد من الموضوع داه لانه لو معملش كدا هتلاقى القوايم ارتفاعها اتغير  بقت 16 و 18 و 20 وكدا 

استلام السلم نجاره 

⦁    استلم منسوب بسطة نصف الدور منسوبه الى الصفر المعمارى 
⦁    استلم ارتفاع القايمه واتأكد ان النجار حط مسمار على الارتفاع المطلوب لكل القوايم 
⦁    اشيك على عرض السلم 
⦁    اشوف عرض النايمه واقيس من داخل اللوح الى داخل اللوح او من الخارج للخارج 
⦁    اقيس تخانة البلاطه وهى المسافه المايله 



الى لقاء قادم فى موضوع  اخر من مواضيع التنفيذ ان شاء الله واذا استفدت من الموضوع ماتنساش تعمل شير عشان غيرك يستفيد