نجارة الاسقف الجزء الاول
السلام عليكم زوار واعضاء موقع معا للتصميم والمقاولات هنقدم لكم فى الموضوع داه كيفية عمل نجارة السقف بالشكل الصحيح مع معرفة مكونات الشده مع خطوات عمل الشده ونصائح هامة لجودة نجارة السقف متمنين لكم كامل الاستفادة ان شاء الله
نصائح سريعه
⦁ خلى بالك قوى من شدات الاسقف لان الغلطه فيها بيكون فيها ارواح بتروح ومسئوليه جنائيه غير طبعا الخسارة الماديه العاليه
⦁ يبقى وانت نازل تستلم تكون هادى جدا وتكون عارف هتستلم ايه بالظبط
⦁ لازم يكون عندك وقت متاح للاستلام عشان تستلم كل التفاصيل وداه هيجى من ترتيب النشاطات
⦁ ماتبدئش فى بند قبل ما تخلص اللى قبله يعنى ما تطلبش الخرسانه قبل ما تستلم النجاره والحداده وتتأكد ان كله تمام لانك هتلاقى المقاول بيضغط عليك عشان ما يديكش فرصه للاستلام
⦁ لازم تكون مستلم كل الشغل بتاعك قبل الصب بيوم او اتنين عشان لو فيه اى مشاكل تقدر تتغلب عليها ويكون عندك الوقت الكافى
⦁ يوم الصب داه يوم مهم جدا للمهندس لازم تكون اول واحد فى الموقع قبل الصب بساعه عشان تشيك ع الشغل تانى ومعاك النجار لو فيه اى مشكله تتحل وتشيك ع المون والاسمنت والمياه لو صب عادى
عناصر الشده للسقف
⦁ الواح اللتزانه : سمكه 2.5 سم وعرضه ( 10 – 12 – 15 ) الدارج 10 و 12 سم واطواله تبدأ من 2.7 متر ويستخدم فى الواح التطبيق – جوانب الكمر – قاع الكمر – تجليد الاعمده – القواعد
⦁ الواح الموسكى : هو نفس خواص اللتزانه بس سمكه 5 سم وعرضه ( 10 – 15 ) وطوله يبدأ من 3 متر وهو فى الغالب يستخدم فى العرقات وهو غير مستخدم بكثره فى مصر
⦁ العروق : المقطع بتاعها ( 10 * 10 – 7 * 7 ) والاطوال تبدأ من 2.7 متر ويستخدم كقوائم
⦁ الطفش : هو فضلات الخشب وله استخدامات كثيره
⦁ اساير : هو لوح ممكن يكون جديد وسليم وتمام بس طوله اقل من 2 متر
⦁ القمط : وهى قطع من الحديد تستخدم لمسك الخشب مع بعضه
مكونات الشده
تتكون شدة السقف بالترتيب من تحت وانت طالع
عروق ..... برندات ...... حمالات ...... عرقات ...... الواح التطبيق
خطوات عمل الشده
⦁ النجار لازم يبقا معاه البلان الانشائى عشان يعرف اماكن الكمر فيعمل حسابه فى الشغل
⦁ الخطوه الاولى للنجار انه يضع فى الاربع اركان بتوع السقف اربع عروق ويمسك العروق مع بعضها البعض بواسطة برندات
⦁ العروق لازم تقف على ارض صلبه كخرسانه او فرشات من العروق يعنى ما ينفعش تتحط على الارض مباشرة او على الطوب والكلام داه
⦁ العروق اللى اصبحت دائريه من كثرة العمل او المسوسه او اللى القوره بتاعتها ( بداية ونهاية العرق ) متأكله هذه كلها مرفوضه تماما فى شدة السقف
⦁ العروق اللى فى الاربع اركان يشد بينهم خيط عشان يرص باقى العروق فى صف مستقيم ورأسى
خلى بالك قوى من المسافه بين العروق
⦁ المسافة بين العروق تتوقف على 3 عوامل ( سمك البلاطه – ابعاد الباكيه – طريقة الصب )
⦁ فى الشغل العادى بتاعنا فى المنشأت السكنيه تتراوح المسافه بين 70 سم الى 90 سم
⦁ فى الفلات سلاب تكون المسافه بين العروق فى حدود 60 سم
⦁ فى السوليد اسلاب المسافة بتكون فى حدود من 70 سم الى 80 سم بحد اقصى
⦁ يبدأ فى توزيع العروق بتاعته على كامل السقف مع مراعاة المسافات ويربط هذه العروق مع بعضها البعض بواسطة البرندات فى الاتجاهين ( X & Y ) ويكونا متعامدين وتكون البرندات على ارتفاع لا يقل عن 2 متر وذالك من اجل سهولة الاستلام
⦁ البرندات تعمل على اتزان الشده فى الاتجاهين
⦁ بتعمل على تقليل الانبعاج على العروق عشان تحافظ عليها
⦁ لو زاد ارتفاع الدور عن 3 متر بنستخدم صف برندات ثانى وممكن يصل الى 3 صفوف
⦁ يطلق على المرحله الماضيه مرحلة التخشيب وهى المرحله الاولى
⦁ نيجى للمرحله الاهم بالنسبه للمهندس والنجار وهى تظبيط منسوب العرقات بمجرد ان ينهى النجار هذه المرحله بيعتبر نفسه انهى السقف
⦁ قبل ما يشتغل النجار فى العرقات يشوف اماكن الكمرات لان فى هذه الاماكن ستتوقف العرقات
⦁ لو النجار هيشد السقف الاول له يبقا لازم ننسب للصفر المعمارى هنروح عند الصفر المعمارى وننقل منه منسوب وليكن ( +1 ) ونرميه على الاربع قوايم اللى فى ركن السقف بواسطة ميزان الخرطوم
⦁ يبدأ النجار فى شد خيط بين العروق وينقل الشرب بتاعه على العروق اللى هتساعده فى عمل العرقات
⦁ يبدأ يحسب منسوب التطبيق هنفرض ان منسوب التشطيب هو ( +3 ) وعندنا تشطيب 10 سم يصبح منسوب الخرسانه ( + 2.9 ) وعندنا سقف 20 سم يصبح منسوب التطبيق ( + 2.7 ) ولكن تخانة الواح التطبيق 2.5 سم يصبح منسوب العرقات المطلوب = 267.5 سم واحنا عندنا منسوب الشيرب بتاعنا على ارتفاع 100 سم يبقا النجار يفرد الشريط ويقيس 267.5 – 100 = 167.5 سم ويكون داه منسوب العرقات اسفل التطبيق
⦁ يفضل ان تكون العرقات فى الطول القصير للباكيه وتكون العرقات عباره عن لوح لتزانه بسمك 2.5 سم فى حالة لو السقف اقل من 15 سم لكن اذا زاد السقف عن 15 سم نستخدم لوح موسكى او لوحين لتزانه نلزقهم فى بعض عشان تتحمل الواح التطبيق ويسمى هذا ( تدبيل العرقات )
⦁ بعد الانتهاء من وضع العرقات يقوم النجار بوضع الحمالات بشكل عمودى على العرقات نستخدم لوح لتزانه واحد فى حالة كان السقف اقل من 15 سم لكن اذا زاد السقف عن 15 سم فى الحاله دى ندبل الحمالات بس يكونوا فوق بعض عشان نزود الانيرشيا
⦁ بعد كدا يبدأ يحط الواح التطبيق عموديه على العرقات
⦁ اخشاب التطبيق يجب ان تكون افضل الواح لتزانه تكون سليمه وقويه يعنى من الاخر نستخدم الالواح القديمه فى الحمالات والعرقات لكن الواح التطبيق نعين لها الخشب الكويس
⦁ هام : الواح التطبيق للباكيه الواحده لازم تكون فى اتجاه واحد عشان تكون كلها عموديه على العرقات عشان العرقات هى اللى شايله الواح التطبيق فبتكون عموديه عليها لكن لو عكسنا اتجاه الواح التطبيق داخل نفس الباكيه هيكون فى الحاله دى الواح التطبيق موازيه للعرقات وتصبح نقطة ضعف فى السقف وتحتاج الى اهتمام وتقويه
⦁ لو شغال فى باكيه والواح التطبيق فيها طوليه والالواح طولها قصير هيضطر يكمل وبالتالى هيقص خشب عشان يكمل فى نفس الاتجاه ( المنشار عدو المقاول ) هيحلها ازاى يقوم حاطط الالواح بالعرض فى الجزء داه عشان يحافظ على الخشب ممكن نعديها بس نعمل شىء اسمه المرايه وهو انى احسب ابعاد الباكيه قبل الشغل واشوف الخشب بتاعى لو مش هيكفى اجى ع الجزء المتبقى واعكس اتجاه العرقات عشان تكون عموديه على الواح التطبيق
⦁ خلاصة القول لما ابدأ فى العرقات ابص على ابعاد الباكيات واشوف ظروف الواح التطبيق ايه معايا عشان اظبط العرقات على هذا الأساس
الى لقاء قادم فى موضوع اخر من مواضيع التنفيذ ان شاء الله واذا استفدت من الموضوع ماتنساش تعمل شير عشان غيرك يستفيد
0 التعليقات:
إرسال تعليق